محکمہ موسمیات نے پنجاب ، خیبر پختونخوا ، کشمیر اور گلگت بلتستان میں آج سے 31 مئی کے دوران آندھی اور بارش کی پیش گوئی کی ہے۔ محکمہ موسمیات کے مطابق چند مقامات پر ژالہ باری ہو سکتی ہے۔
ژوب، زیارت، بارکھان میں بھی آندھی اور بارش متوقع ہے۔ این ڈی ایم اے نے بھی ایمرجنسی آپریشن سینٹرز کو ایڈوائزری جاری کر دی ہے۔
تیز آندھی، جھکڑ کے دوران شہریوں کو احتیاطی تدابیر اختیار کرنے کی ہدایت جاری کی گئی ہے۔
محکمہ موسمیات کا کہنا ہے کہ سندھ کے کچھ بالائی، جنوب مشرقی علاقوں میں گرج چمک کے ساتھ بارش کا امکان ہے، سکھر، لاڑکانہ، جیکب آباد، شہداد کوٹ، تھر، مٹھی، اسلام کوٹ میں بارش ہو سکتی ہے۔
دادو، جوہی، سیہون، نوابشاہ قاضی احمد، ہالہ، مٹیاری، حیدرآباد، جامشورو میں بھی بارش کا امکان ہے۔
کراچی میں آئندہ 24 گھنتے کے دوران موسم گرم اور مرطوب رہے گا، محکمہ موسمیات کے مطابق آج شہر میں دن کے وقت درجہ حرارت 38 ڈگری سینٹی گریڈ تک رہنے کا امکان ہے، جو 50 ڈگری محسوس کیا جا سکے گا۔
محکمہ موسمیات کے مطابق شہر میں زیادہ سے زیادہ درجہ حرارت 37 سے 39 ڈگری سینٹی گریڈ تک جا سکتا ہے۔
محکمہ موسمیات کا کہنا ہے کہ شہر میں کم سے کم درجہ حرارت 29.5 ڈگری سینٹی گریڈ ریکارڈ کیا گیا۔
