سابق صدر پاکستان، عارف علوی اور ان کے اہل خانہ کے اکاونٹس منجمد کرنے کے خلاف سندھ ہائی کورٹ میں سابق صدر اور اہلِ خانہ کی درخواست کی سماعت ہوئی۔
درخواست گزار کے وکیل، بیرسٹر علی طاہر نے عدالت کو بتایا کہ عارف علوی، ان کی اہلیہ اور بچوں کے بینک اکاؤنٹس منجمد کیے گئے ہیں۔
اُنہوں نے بتایا کہ فیڈریل انویسٹی گیشن ایجنسی (ایف آئی اے) نے انکوائری کی بنیاد پر پوری فیملی کے بینک اکاؤنٹس منجمد کیے۔ بیرسٹر علی طاہر نے مزید بتایا کہ اکاؤنٹس منجمد ہونے سے روز مرہ کے اخراجات پورے کرنا مشکل ہوگیا ہے۔
عدالت نے بیرسٹر علی طاہر سے استفسار کیا کہ آپ کو بھی تو یہ کیس لڑنے کےلیے فیس کی ادائیگی کی گئی ہوگی۔ جس پر بیرسٹر علی طاہر نے جواب دیا کہ میں یہ کیس بغیر فیس کے لڑ رہا ہوں۔
عدالت نے ریمارکس دیتے ہوئے کہا کہ فریقین کو نوٹس جاری کرکے جواب طلب کرلیتے ہیں، فریقین کے جواب آنے دیں، پھر دیکھتے ہیں۔
عدالت نے فریقین کو نوٹس جاری کرتے ہوئے 5 جون تک جواب طلب کرلیا۔
