پاک فوج کے شعبہ تعلقات عامہ آئی ایس پی آر کے مطابق 6 اور 7 مئی کی درمیانی شب بھارتی افواج نے بلا اشتعال اور وحشیانہ حملے شروع کیے۔ جن میں خواتین، بچوں اور بوڑھوں سمیت معصوم شہریوں کو نشانہ بنایا گیا۔
آئی ایس پی آر کے مطابق بھارتی حملوں میں 40 شہری شہید ہوئے۔ جن میں 7 خواتین اور 15 بچے شامل ہیں، جبکہ ان حملوں میں 10 خواتین اور 27 بچوں سمیت 121 افراد زخمی بھی ہوئے۔
ترجمان کے مطابق بھارتی جارحیت کے جواب میں پاکستانی مسلح افواج نے بھرپور جوابی کارروائی کی اور 11 جوانوں نے جام شہادت نوش کیا، جبکہ 78 فوجی جوان زخمی ہوئے۔
آئی ایس پی آر کے مطابق شہداء میں نائیک عبدالرحمٰن، لانس نائیک دلاور خان، لانس نائیک اکرام اللّٰہ، نائیک وقار خالد، سپاہی محمد عدیل اکبر اور سپاہی نثار شامل ہیں۔
پاک فضائیہ کے شہدا میں اسکواڈرن لیڈر عثمان یوسف، چیف ٹیکنیشن اورنگزیب، سینئر ٹیکنیشن نجیب، کارپورل ٹیکنیشن فاروق، سینئر ٹیکنیشن مبشر شامل ہیں۔
ترجمان کا کہنا ہے کہ شہداء کی عظیم قربانی ان کی بہادری ، ہمت، لگن اور غیر متزلزل حب الوطنی کی لازوال علامت ہے، شہداء کی عظیم قربانی کو ہمیشہ یاد رکھا جائے گا۔
آئی ایس پی آر کا کہنا ہے کہ قوم جارحیت کے سامنے پُرعزم ہے اس میں کوئی ابہام نہیں رہنا چاہیے، پاکستان کی خود مختاری یا علاقائی سالمیت کو چیلنج کرنے کی کوشش کا بھرپور اور فیصلہ کُن جواب دیا جائے گا۔
