حج آپریشن کی پہلی پرواز پی کے 713، 442 عازمین حج کو لے کر صبح 4 بج کر 45 منٹ پر اسلام آباد سے مدینہ روانہ ہوئی۔ کوئٹہ سے بھی پہلی حج پرواز پی کے 7201 صبح 10 بجے 170 حجاج کو لے کر روانہ ہوئی۔
عازمین حج کووفاقی وزیر مذہبی امور ، سردار یوسف، پاکستان میں سعودی سفیر، نواف المالکی اور پی آئی اے کے چیف ایگزیکٹیو آفیسر ، ایئر وائس مرشل عامر حیات نے رخصت کیا اور خصوصی تحائف دیئے۔
لاہور سے پہلی حج پرواز پی کے 747 رات 10 بجے 323 مسافروں کو لے کر مدینہ روانہ ہوگی۔ قومی ایئر لائن پی آئی اے تقریبا 35200 عازمین حج کو 117 سے زائد خصوصی پروازوں کے ذریعے حجاز مقدس پہنچائے گا۔
پہلے مرحلے میں حجاج کرام کی خصوصی پروازیں پاکستان سے مدینہ کے لیے روانہ ہوگی، جبکہ دوسرے مرحلے میں جدہ جائیں گی۔
پی آئی اے پاکستان کے 6 بڑے شہروں اسلام اباد ، کراچی ، لاھور ، پشاور ، ملتان ، اور کوئٹہ سے براہ راست حج پروازیں آپریٹ کرے گی۔
اسلام آباد اور کراچی ایئرپورٹ پر سعودی حکومت کے اشتراک سے طریق مکہ (روڈ ٹو مکہ)کی سہولیات دستیاب ہوں گی۔ جس سے حجاج سعودی امیگریشن پاکستان سے کروا کے جائیں گے۔
پی آئی اے کا قبل از حج آپریشن 31 مئی تک جاری رہے گا، جبکہ بعد از حج آپریشن کا آغاز 10 جون سے ہو گا اور 10 جولائی کو اختتام پذیر ہو گا۔
