پاکستان ایئرپورٹس اتھارٹی (پی اے اے) نے ایئرپورٹس کے آپریشنل ایریاز، ایپرن ایریا اور طیاروں کی مینٹیننس کی جگہوں پر فوٹو گرافی اور ویڈیو بنانے پر پابندی عائدکردی۔
پاکستان ایئرپورٹس اتھارٹی نے پابندی کے حوالے سے تمام ایئرلائنز اور ایوی ایشن کمپنیز کو مراسلہ جاری کردیا ہے۔
پی اے اے کےمراسلے کے مطابق طیاروں کی مینٹیننس کے دوران صرف ضرورت کے تحت متعلقہ ایئرکرافٹ انجینئرز اور عملہ کو طیارے کی تصویر یا ویڈیو بنانے کی اجازت ہوگی۔
ایئرپورٹس پر کام کرنے والے ایئرلائن، گراوٗنڈ ہینڈلنگ سروس سمیت تمام ملازمین کو سختی سے پابند کردیا گیا ہے۔ خلاف ورزی کی صورت متعلقہ ایرلائن اور ملازمین کے خلاف سخت کارروائی کی جائے گی۔
ذرائع کے مطابق پاکستان ایئرپورٹس اتھارٹی نے پابندی پی آئی اے کے طیارے کی تصاویر لیک ہونے کے بعد عائد کی ہے۔
پاکستان ایئرپورٹس اتھارٹی کے منیجر ایئر سائیڈ اظہر فاروق نے تمام ایئرلائنز اور ایوی ایشن کمپنیز کو مراسلہ جاری کردیا۔
