طورخم سرحد بارڈر فورسز کے درمیان کشیدگی کے باعث جمعہ کی رات سے بند ہے۔ پاکستان اور افغانستان کے بارڈر حکام کے درمیان پیر کو بھی مذاکرات بغیر کسی نتیجہ کے ختم ہو گئے تھے۔
اطلاعات کے مطابق افغان حکام کی جانب سے سرحد کے زیرو پوائنٹ پر ایک چیک پوسٹ کی تعمیر پر دونوں ممالک کی بارڈر فورسز کے درمیان کشیدگی کا آغاز ہوا۔ جس کے بعد گزشتہ پانچ روز سے طور خم بارڈر پر ہر قسم کی آمدورفت معطل ہے۔
پاکستان نے سیکورٹی ہائی الرٹ جاری کے بارڈر ہر قسم کی ٹریفک کے لیے بند کر دیا۔ طور خم بارڈر بند ہونے سے مسافروں اور تاجروں کو مشکلات کا سامنا ہے۔
بارڈر پار کرنے کا انتظار کرنے والے سینکڑوں افراد دونوں اطراف میں پھنسے ہوئے ہیں اور تجارتی نقل و حمل بند ہونے کی وجہ سے تاجروں کو کروڑوں کے نقصان کا خدشہ ہے۔
