خیبرپختونخوا میں سرکاری جامعات ایکٹ میں ترمیم کے بعد صوبے کی تمام سرکاری یونیورسٹیز کی چانسلر شپ گورنر فیصل کریم کنڈی سے وزیر اعلیٰ علی امین گنڈا پور کو منتقل ہو گئی۔
وزیر اعلیٰ کو چانسلر کے اختیارات منتقل کرنے کے لیے مراسلہ بھی گورنر سیکریٹریٹ سے جاری کر دیا گیا ہے۔ جس میں جامعات کا تمام ریکارڈ وزیر اعلیٰ سیکریٹریٹ کے حوالے کرنے کی ہدایت کی گئی ہے۔
مراسلے کے مطابق تمام زیر التوا مقدمات اور شکایات بھی وزیر اعلیٰ سیکریٹریٹ کے حوالے کی جائیں۔ وی سیز کو آئندہ خط و کتابت وزیر اعلیٰ سیکریٹریٹ سے کرنے کی ہدایت کی گئی ہے۔
واضح رہے کہ نومبر 2024 میں صوبائی کابینہ نے جامعات کے قانون میں ترمیم کی تھی۔ جس کے مطابق وائس چانسلرز کی مدت ملازمت 4 سال کی گئی اور جامعات کے وائس چانسلرز کے تقرر کا اختیار بھی وزیر اعلیٰ کے پاس آ گیا ہے۔
ایکٹ میں کی گئی ترمیم کے مطابق وزیر اعلیٰ تمام پبلک سیکٹر یونیورسٹیز کے چانسلر ہوں گے۔
