حکومت پاکستان نے رجسٹرڈ افغان مہاجرین کو بھی جڑواں شہروں راولپنڈی اور اسلام آباد سے واپس ان کے وطن بھیجنے کا فیصلہ کرلیا۔
اس حوالے سے جاری اعلامیے میں کہا گیا ہے کہ وزیراعظم ہاؤس نے تمام سفارتخانوں بشمول افغان سفارتخانے کو بھی خط ارسال کردیا ہے۔
پروف آف رجسٹریشن( پی او آر) رکھنے والے افغان باشندوں کو اسلام آباد اور بھی راولپنڈی سے نکالا جائے گا مگر انہیں فوری طور پر بے دخل نہیں کیا جائے گا۔
وفاقی کابینہ نے پی او آر رکھنے والے افغان باشندوں کو جون تک پاکستان میں رہنے کی اجازت دی ہوئی ہے۔
پاکستان میں پی او آر اور افغان سٹیزن کارڈ (اے سی سی) رکھنے والے افغان باشندوں کی مجموعی تعداد تقریباً 20 لاکھ ہے، جن میں سے 13 لاکھ پی او آر اور 7 لاکھ اے سی سی کے حامل ہیں۔
اپنے ملک افغانستان کے علاوہ کسی اور ملک منتقلی کے منتظر افغان باشندوں کو 31 مارچ تک اسلام آباد اور راولپنڈی سے منتقل کر دیا جائے گا۔
اگر کوئی افغان مہاجر کسی تیسرے ملک میں منتقل نہ ہو سکا تو اسے افغانستان واپس بھیجا جائے گا۔
